Gonzalo Llamedo Pandiella ta acabante de publicar el poemariu Los fíos de Bauman: obra n’asturianu reconocida col Premiu “Fernán Coronas” 2022. El poemariu emplega como marcu metafóricu l’imaxinariu sociodiscursivu de la modernidá líquida de Zygmunt Bauman, col envís de representar la dificultá de les xeneraciones del nuestru tiempu pa comprender los cambios globales y p’asumir un paradigma distintu del que conocimos de la mano de les mas y de les güeles.
El poemariu tien dos partes, coles que se predente reflexar que les tresformaciones vienen dándose tanto a nivel social como na vida privada. La primer parte, La Vida líquida, aplica esti imaxinariu baumanianu a la interpretación de dellos recuerdos y vivencies personales del pasáu, mientres que na segunda parte, La Sociedá líquida, el yo poéticu xuega a facer una llectura crítica de dellos aspectos rellacionaos colos procesos de cambéu social, tocando temes como la desinformación, la contaminación o les desigualdaes de xéneru.
Una de les particularidaes del poemariu ye l’amiestu de la instrospeición y de la crítica social col usu de la retranca en dalgunos momentos, llegando a buscar l’absurdu. Trátase d’una manera de representar l’actitú provocadora de Bauman, que buscaba col tremendismu movilizar la xente y qu’evaluaba la realidá social con una mezcla de señardá y esperanza. Esti tratamientu más simpáticu va acompañáu d’una disposición de los versos visual y desenfadada.
