Dixo Rouco. Por José Ángel Gayol.16/01/2009

0
53

 

DIXO ROUCO
José Ángel Gayol
 

L’otru día tuvi falando con unos amigos sobre’l futuru de la Ilesia, dos díes dempués Rouco celebró una folixa llitúrxica pola familia y, al poneme a escribir estes pallabres, alcordéme que lo que dixo l’amigu Rouco nuna ocasión: que la nueva asignatura d’Educación pa la Ciudadanía nun ye constitucional, o que polo menos tien dudes… el bonu d’él. Y ye que yo tamién tengo duldes de que munches coses que se faen nesti país seyan constitucionales, pero l’asignatura esa de xuro que sí lo ye.

 

Dixo Rouco, que ye un cachondu (tien que selo, porque nun lo pue dicir en serio y quedar tan panchu), que l’Estáu nun ye quien, nin xurídica nin moralmente, pa empobinar una asignatura que forme a los neños dende un puntu de vista éticu. O seya, que formar a los guah.es como ciudadanos nun ye competencia del Estáu, porque taría dirixendo un aspeutu que depende de les families y la formación moral que quieran da-yos a los guah.es. Toma yá. Ehí quedó eso.

Agora bien. La llibertá d’espresión ¿nun ye un principiu moral? ¿Y el drechu a la vida, a nun sufrir malos tratos o tortures? ¿O ye que la llibertá d’aconceyamientu nun ye un drechu básicu de tolos ciudadanos, de tolos seres humanos a seques? Porque eso ye lo qu’enseña Educación pa la Ciudadanía. La normativa ciudadana qu’hai n’España. Dempués, en casa, los guah.es recibirán la formación moral que los pás quieran da-yos, colo que dalgún día, cuando seyan mayores y si nun tan d’alcuerdu cola normativa, podrán cambiala como ciudadanos responsables, al traviés del votu a la opción democrática correspondiente.

¿Qué tien que ver la formación relixosa de la que fala Rouco cola formación moral? ¿O ye que los mandaos morales de la Santa Ilesia nun tan d’alcuerdu colo que diz la Constitución? Pues si ye asina… malo, malo ¿eh?

El códigu moral que tienen que siguir los ciudadanos d’esti país ye’l que marca la Constitución y les lleis que la desarrollen. Y puntu. Ente los drechos que reconoz ta’l de llibertá relixosa, pero eso nun supón que toos tengamos que ser católicos, la llibertá relixosa nun ye eso. La llibertá relixosa ye que caún faga lo que quiera ensin molestar a los demás. Pa nun molestar a los demás ye pa lo que ta la Constitución, p’afincar un códigu moral neutru de comportamientu ente tolos españoles, católicos y non.

La Constitución pon les regles del xuegu de la convivencia. A lo meyor, hailos que quieren xugar ensin aceptar les regles. Que tamién pue ser.

 

Dejar respuesta

Please enter your comment!
Please enter your name here