Xune Elipe

0
169

  

 

30 años lleva Dixebra glayando n’asturianu con compromisu y soníu mui propiu amestando la música astur con un batulax de influencies pergrandes onde relluma’l mestizaxe. 30 años nos que estremaos testos de escritores ficieron un camín de lluz cola gaita. Falamos de too ello con Xune Elipe, cantante de Dixebra. Cuando Xune da’l primer blincu enriba  l’escenariu la folixa entama abaxo nel prau.

 -A lo llargo de 30 años na música, ta claro que podemos falar d’un enantes y        depués del rock n’asturianu gracies a Dixebra…

– Home, nun somos nós los más apropiaos pa dicilo… De toes maneres tampoco  queremos cayer na falsa modestia, somos conscientes de qu’una trayectoria como la de Dixebra sí que ye importante pa la historia musical asturiana. Paeznos qu’abrimos el camín pa qu’otra xente pudiere venir detrás y tener les coses un poco más fáciles.

-Dixebra foi una banda pionera en muchos aspectos, la llista de grupos que canten n’asturianu ye cada vez más bayurosa nesti tiempu.

– Ye dalgo lóxico y normal, si la xente mozo medra sintiendo música n’asturianu, llegáu’l momentu d’entamar un grupu ye factible qu’escueya esta llingua pa espresase. Lo qu’escuches va influyite a la hora de facer la to propia música y presta pensar que Dixebra tuvo dalgo que ver nos grupos que canten n’asturianu.


-Xandru Fernández, Andrés del Solar, César «Maniegu», Pablo Texón, Francisco Alvárez, Quique Faes, Manuel Asur, Pablo Antón Marín Estrada, Boni Pérez, Pepín Quevedo o Gabriel Celaya, son lletristes del grupu. ¿Cuála ye la vuestra rellación cola lliteratura?

– Mui fonda. Préstanos lleer n’asturianu, un idioma nel que se fai mui bona lliteratura. Si de dalgo podemos sentinos arguyosos ye de contar con testos de toos esos escritores y poder difundir les sos creaciones o facer que los nuestros siguidores s’interesen poles sos obres. Dixebra nun sería lo mesmo ensin l’apoyu y les lletres d’escritores del altor de Xandru Fernández o Quique Faes.

-¿Un cantar ensin un bon testu que lu sofite ta coxu?

– Pa nós, polo menos, ensin dulda. Hai otres propuestes musicales que supediten les lletres a la música, pero en Dixebra eso nun ye asina. Una canción nun ye «redonda» si la lletra nun respuende a la espectativa d’una bona melodía.

-¿Ye un factor fundamental nel éxitu del grupu xunir lo tradicional y lo moderno?

– Los soníos tradicionales asturianos son una parte más (importante) de la nuestra propuesta. Una aportación de Dixebra al panorama musical del nuestru país foi manifestar la versatilidá de los ritmos, melodíes y instrumentos provenientes de la tradición, que son quien a adaptase y complementase perfectamente en contestos sonoros mui diversos.

-Dende los sos primeros discos Dixebra siempre apostó pola independencia y autoxestión ¿Ye esi’l camín que va tomando’l mundu discográficu agora?

– L’autoxestión va con nós dende los primeros tiempos, ye dalgo consustancial a la banda. Tener nes tos manes tolo que conlleva manexar una actividá como la musical date la llibertá necesaria pa ufiertar el productu final que realmente quies que llegue al públicu. Col tiempu vióse que ye una de les opciones más atractives pa les bandes, por dalgo será.

– Faciendo nestos 30 años cuasi de too na música ¿pa ónde tira’l tren de Dixebra?

– La verdá que nun sabemos. De momentu’l tren nun escarriló y tovía ta en condiciones de siguir aportando a munches estaciones.

Lauren García

Dejar respuesta

Please enter your comment!
Please enter your name here