LA MANADA

0
116
lobos en la nieve

 LA MANADA

Mª Esther García López

Los llobos siempre van en manada

Esta temporada sentimos cada poco pronunciar la pallabra manada, y viénseme la memoria "manada de llobos", porque lo qu´a una-y impresiona na infancia ye lo que va quedando nel maxín y magar manada ye una pallabra que pue referise a cualquier grupu d´animales d´una mesma especie, a mi traime a la memoria los llobos. Y por asociación llévame a pensar na "manada" de llobos humanos violadores.
El llobu siempre se consideró n´aldea un animal malu, un animal al que se-y teme porque los sos aullíos caltrien hasta los más fondu del alma, y porque ye un animal que ve sin ser visto, como nos dicíen a nós. La xente andaba de nueche d´un llau pa otru ensin lluz y nes nueches escures, cuando diben pelos caminos, dicíase que si´l llobu taba cerca a los paisanos entamaba a llevantáse-yos la gorra de mieu. Nun se dexaba ver y caleyaba a la par d´ellos. Y sabíen perbién que cuando los rondaba´l llobu enxamás taba solu, darréu apaecía la manada.
Pero a la moza que sufrió l´agresión xabaz de la "manada de llobos humanos", dalgo-y impidió pescanciar que se-y acercaben aquellos monstruos.

Por eso´l grupu de "llobos violadores" que se bautizó col nome de "la manada", de xuru que nun foi casualidá, llobos humanos de los más xabaces y perversos col pensamientu de dir a llugares onde l´alcohol y otres sustancies los ponen a tonu pa dir en manada y llevar al cabu lo que yá traíen tramáu: facer aberraciones sexuales cola que se-yos cruzare nel camín.

Y tocó-y a ella, como y pudo tocar otra, con cinco "llobos" violadores p´ataca-y ensin nengún reparu.

Asina nos dicíen a nós cuando yéremos pequeños, si veis al llobu nun vos mováis qu´entós ataca de xuru y amás al momentu apaez la manada.
N´estáu de “schok” argumenten los xueces que la moza nun se resistió. Ante tal ataque de "llobos" alloquecíos poco diba poder facer. Quiciabes entós la mataren por oponer resistencia.

Clamiamos por una xusticia qu´ensin dar tantes vueltes a la llei ponga les penes acordies col delitu cometíu.

Clamiamos por que se revise la tipificación de los delitos sexuales y que se reforme la llei con procuru y rigor y cola presencia na comisión de muyeres, polo menos a partes iguales, porque tenemos muncho que dicir y que defender. Hasta la fecha la comisión asesora taba integrada por venti homes, y nenguna muyer, llueu regaláronnos cuatro puestos y nun sé si por fin se llegará a equilibrar. Como si nun hubiere muyeres preparaes pa ocupar esos cargos. Más siendo qu’ hai que xulgar delitos graves que son, sobre too, cometíos por homes contra muyeres.

¡Cuánto camín nos queda por andar!

Non más "manadas" de "llobos" sueltos. Namás nos falta que tamién los xueces los declaren especie protexida. Cualquier cosa se pue esperar. Tamos indefenses. Tamos cada día más indefenses

http://www.lne.es/blogs/filazon/

 

Dejar respuesta

Please enter your comment!
Please enter your name here